2012年12月31日星期一

眼睛系列 - 後記



「眼睛系列」是我有生以來,暫時寫得最多字數的文章。回想讀書時期,中文作文永遠字數不足而被扣分的我,現在的對比實在很大。

靈感來自我身邊一位視力有問題的人。在跟當事人相處中,發覺這人所遇到的問題,旁人未必體會得到。我嘗試代入這人的角度,因而寫成「眼睛不能沒眼淚」一篇。故事內容除了視力問題是真的外,其他一概憑空創作。

眼睛系列(8/8) - 如果的事 - Eugene篇(下)



會面的幾日後,Eunice接到模特兒公司的電話,通知她可以隨時上班。一星期後,Eunice懷著戰戰兢兢的心情,展開她人生的第一份工作。由於IT部門內,全部都是上了年紀的男人,她根本溶入不到他們的圈子,再加上她的工作枯燥乏味,因此她在這裡工作得很不開心。

2012年12月28日星期五

Les Misérables



小弟第一次接觸「悲慘世界」(港譯孤星淚)係中學時代。當年學校搞班際歌唱比賽,班中嘅活躍份子就揀咗「Do you hear the people sing」呢首歌嚟唱喇。小弟由於五音不全,比賽當日只係濫芋充數,夾吓口型就算,至於比賽結果,好似係輸咗,唔記得喇。長大咗之後,再聽番呢首歌,真係覺得好正呀!


眼睛系列(7/8) - 如果的事 - Eugene篇(上)



Eunice一邊走回沙灘一邊回答說:「係呀,有幾張係人哋畀我嘅。而其餘大部份相係我仿照佢嘅style影嘅。嘩!你又知嘅,咁叻嘅。Tony,唔通你係Danny嘅朋友?」

Tony用很嚴肅的語氣回答說:「都可以咁講喇。Eunice,其實我哋並唔係咩嘢電影公司嘅人。我老細係Danny嘅朋友,但係大家幾年前失去聯絡,我老細搵晒識Danny嘅人,都唔知佢去咗邊。我老細真係好想同Danny見面,你可以幫忙聯絡Danny嗎?」

2012年12月26日星期三

今次賴嘢喇


趁今日假期,小弟喺樓下茶餐廳食完個brunch之後,就去咗行山,諗住消耗一吓呢幾日吸收咗嘅卡路里喇。

行咗大約一個多鐘之後,一個唔小心扭一扭,拉傷咗膝頭嗰條根,今次真係......唉,賴嘢喇。行到一半,番轉頭又唔係,繼續行又唔係,而家隻腳上山完全冇問題,但係每落一級就痛到仆街,差D痛到眼淚水都標埋。


2012年12月25日星期二

眼睛系列(6/8) - 忽然之間 - Mandy篇(下)


壬先生在人前對她尚算規矩,在人後亦不太過份。一個月很快便過去了,壬先生遵守承諾,真的投資了一筆錢,開拍一部低成本電影給她,讓她一嚐女主角的滋味。電影在2010年尾上畫,反應雖然算不上很好,但總算提高了Mandy在香港的知名度。Mandy為多謝壬先生的投資,在2011年新年黃金檔期後,她主動地到廣州與壬先生見面,請他吃了一頓豐富的晚飯,留至翌日下午才乘坐直通車回港。

2012年12月22日星期六

眼睛系列(5/8) - 忽然之間 - Mandy篇(上)



Mandy離開酒店的Coffee Shop之後,便怱怱趕往影樓拍攝硬照。酒店的停車場內停泊了一輛Porsche Cayman,車外站著一名衣著光鮮的男子,他正在吸煙。

這名男子邊向遠方揮手邊高叫:「喂,Mandy,呢邊呀,快D喇,趕時間呀。」

兩人登車後,跑車高速向影樓駛去。一輪沉默後,該男子先說:「你同Danny講清楚嗱?佢冇大吵大鬧吖嘛?」


2012年12月19日星期三

眼睛系列(4/8) - 活著多好 - Eunice篇(下)


Daniel聽完以後,整個人目定目呆,他的表情清楚明白的告訴大家,他是如何不滿這個故事。可是,阿June卻聽得津津有味。Daniel為了要討好心儀的阿June,無奈地讚成用這一故事作為網頁的題材。

訂好題材後,三人開始分工。Daniel負責技術上的問題,如編寫、分頁版面、超連結互連等;Eunice負責美工、拍攝相片及製作短片等;由於阿June樣子甜笑,所以安排她負責充當花瓶的角色,作為相片、短片中的主角,代入model的角色去帶出這個故事。

2012年12月16日星期日

眼睛系列(3/8) - 活著多好 - Eunice篇(上)


Eunice回到家中,將身上的背包及Danny送贈的相機隨意地放到椅子上,轉身便去洗澡了。洗澡過後,她與媽媽兩個一起吃晚飯,細說今天與自己有好感的男同學Daniel一起傾project,但最後去了看電影,還有輕輕交代了如何獲得Danny的相機。由於今日很累,Eunice食飽後攤在梳化上看電視,不知不覺間睡著了,直到天亮。

「阿女,你快D過嚟睇吓今日份報紙,係呢一格呀,你認唔認得呀?」海叔遞上報紙,一臉緊張地說。Eunice一手接過報紙,看了標題後,如觸電般全身僵硬了。

2012年12月15日星期六

柒公民系列(一) - 逆子弒母(3/3)



Bobby見有人同佢唱反調,職業病即時發作,力sell 吳繫仁就係殺人兇手。佢一輪咀咁話:「證據多蘿蘿喇,求其講幾個都夠喇。首先,12月7號嗰晚,有鄰居聽到何婆婆屋企有爭吵聲,仲要係男人聲添。仲有喎,大廈嘅閉路電視拍到吳繫仁一路講電話,一路好匆忙咁離開大廈。最後,吳繫仁畀人拉嗰日,係佢身上搜到兩條可以用嚟打開何婆婆屋企大門同埋鐵閘嘅鎖匙。」

其餘6個人好留心咁聽佢講,張師奶仲係咁點頭和應添。Bobby見有人支持,飲咗啖水之後繼續發表佢嘅偉論:「我認為成件事係咁嘅,呢個不孝子因為要錢買白粉,咁咪靜雞雞潛入阿媽屋企偷嘢囉,點知畀阿媽發現,阿媽同佢吵大鑊,佢一怒之下,咪摙死咗阿媽,之後攞晒D值錢嘢走囉。成件案就係咁簡單喇,唔好簡單複雜化喇。」

2012年12月12日星期三

柒公民系列(一) - 逆子弒母(2/3)



警方經過三星期嘅深入調查之後,終於鎖定咗疑兇係邊個喇,佢哋仲部署咗今日拉人添。

黃昏時份喺上水某一橫街,有個好似瞓未醒嘅中年男人喺度嗌:「埋嚟睇,埋嚟揀喇喂。一百蚊三隻,越睇越大隻呀。難得開到舖,埋嚟揀幾套喇………喂,老細,唔買都過嚟睇吓吖……」

2012年12月9日星期日

柒公民系列(一) - 逆子弒母(1/3)



講故仔之前,我要同識我嘅朋友講聲先。我寫呢個故仔,同我自己嘅個人經歷完全冇關嘅。呢個故事嘅靈感,係由一套電影「十二怒漢 (12 Angry Men)」而嚟嘅,你哋睇,連個名都係抄嘅。 

不過,呢個故事發生嘅地點喺香港,而唔係美國。原著嘅陪審團係有十二個人,香港嘅陪審團分別只有七個人或者係九個人所組成。咁點解我唔寫九個人呀,因為我懶囉,寫少兩個,起碼慳番幾段呀。好喇,唔講咁多,故事正式開始喇。

本故事純屬虛構,如有雷同,實屬巧合。

2012年12月6日星期四

眼睛系列(2/8) - 眼睛不能沒眼淚 - Danny篇(下)


在長期煙、酒、休息不足的生活下,Danny的身體慢慢地出現變化。直到有一次,他在為模特兒拍攝雜誌封面時,突然失去知覺,暈倒當場。當Danny醒來的時候,已經身處於急症室的病房內。醫生為他作了詳細的檢查,得出的結論是疲勞過度及血糖過低,醫生建議他飲食定時和減少工作量。Danny聽取醫生的建議,並向公司請了一個月的大假,與Mandy去歐洲shopping,叉足電後才回來繼續搏殺。

2012年12月3日星期一

眼睛系列(1/8) - 眼睛不能沒眼淚 - Danny篇(上)

網上相片

深秋的某一個星期日黃昏,一班由中環碼頭開往長洲的渡輪上,有一個戴住墨鏡的男人,獨個兒坐在船尾的窗邊座位。他個子不高、頭髮凌亂,背著一部三年前Canon製造的單鏡反光相機,呆呆望著窗外。他緩緩的站起來,將背著的相機除下,並放到自己的座位上。自己則倚在窗邊,繼續若有所思地望著維港的景色。

由於是星期日黃昏,乘客不多,因此船上格外寧靜。涼風輕輕的吹著,伴隨著海浪聲,感覺相當放鬆。


2012年12月2日星期日

我的啓蒙


每個人決定去做事之前都會有一D誘因嘅,舉兩個例吖。我有個朋友去咗做警察,誘因係佢細個時喺街唔見咗媽媽,警察叔叔幫佢搵番媽媽。我另一個朋友呢,就放棄要高薪厚職,誘因係佢之前份工要隨時去外地工作數月,而佢就想多D時間陪屋企人。

我決定寫Blog嘅誘因係睇咗一個人嘅Blog,再加上最近生活過得好枯燥、好平淡,好想搵d嘢搞吓。而呢個人就係......

2012年11月30日星期五

I‧I(2/2) - 四個男孩在郊野公園的一夜


頑童日記二部曲 -II - 四個男孩在郊野公園的一夜(下)

本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

一個男人泊咗架車喺油站入油之後,落車行咗去對面行人路。佢一路食煙,一路打電話,電話響咗兩吓就接通,電話嘅另一端傳來……


2012年11月26日星期一

I‧I(1/2) - 四個男孩在郊野公園的一夜



頑童日記二部曲 - II - 四個男孩在郊野公園的一夜(上)

本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

凌晨一點幾,喺郊野公園燒烤場邊嘅馬路度。

3…… 2…… 1…… 動L! ! !」大佬大叫。

一架私家車急速煞制,兩秒後從新開車,車內坐咗一男一女,兩個都冇出聲。

2012年11月22日星期四

大魚食細魚



尋晚同一班朋友去食日本嘢,當大家一路食魚生嘅時候,朋友C就講:

「你哋知喇,我有養開魚嘛。前幾晚放工番到屋企,我行埋個魚缸度一睇。嘩!好嘢,生咗好多魚仔呀,咁我餵完魚咪去沖涼囉。點知我沖完涼出番嚟一睇,哎呀!好慘呀!D大魚喺度食緊D魚仔呀,仲食到七七八八添呀。不過,有幾條比較醒目,匿埋咗係D石仔與石仔之間,由於大魚體積太大,所以食唔到呢幾條醒目魚,我咪即刻攞個網嚟展開救b行動囉。」

2012年11月21日星期三

天梯



早上10點幾,長長嘅樓梯下面圍住咗十幾人,好似有事發生咗咁喎。幾分鐘後,救護車嚟到,救護員好快手快腳咁將一個阿伯抬咗上車,司機響起警號後,高速向醫院駛去。

救護車離開後,頭先睇到晒成件事發生嘅街坊三姑就話:「哎呀,真係慘喇,頭先阿老梁諗住落街買餸,點知落樓梯叉錯腳,係咁碌…係咁碌咗落嚟囉,碌到落嚟攤咗喺度郁都唔郁吓。咁我就梗係即刻打3條9喇,之後唔洗5分鐘,救護車就嚟到喇……希望梁伯今次大步檻過喇,你哋知唔知呀,呢條樓梯好邪……幾年前………」

2012年11月20日星期二

飛虎(2/2) - 兩個好鍾意玩玩具鎗嘅男孩



頑童日記首部曲 - 飛虎 - 兩個好鍾意玩玩具鎗嘅男孩()

本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

羅拔臣神氣地說:「Mission accomplished. Let's get out of here.

高達仔一臉認真,面向羅拔臣,提起右手放喺額頭右側作一個敬禮狀。之後,大家哈哈大笑,從容咁向另一條樓梯落樓。當佢哋兩人行到走廊盡頭,準備落樓梯嘅時候,高達仔下意識咁回望頭先嘅露台,諗住回味一番之際。


飛虎(1/2) - 兩個好鍾意玩玩具鎗嘅男孩




頑童日記首部曲 - 飛虎 - 兩個好鍾意玩玩具鎗嘅男孩()

本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

「叮噹、叮噹叮噹、叮噹……

突如其來嘅門鐘聲將原本專注咁砌緊模型嘅高達仔驚醒,佢一路放低手上嘅剪鉗一路嗌:「嚟喇,嚟緊喇。」一路嗌,心裡面又諗:「頂!邊個契弟阻住我砌模型呀。」


2012年11月19日星期一

只有愛才可以回答



呢篇係「呢個就係你要走嘅原因 - 搖滾米高」嘅下集,如果想更加了解整個故事嘅背景,我建議大家睇咗上集先。不過,大家都可以當呢個係獨立嘅故事嚟睇嘅。
 
星期六淩晨差唔多兩點,外面落緊雨,啱啱同3band友飲完嘢嘅Michael好狼狽咁上咗架的士。話咗畀司機知去邊度之後,身心疲累嘅佢攤咗喺度,側側頭呆呆咁望住窗外。突然間,司機急速剎制,Michael因為冇戴安全帶嘅關係,差D飛咗出前面。

2012年11月18日星期日

呢個就係你要走嘅原因 - 搖滾米高



「冷雨夜我在妳身邊 盼望妳會知 可知到我的心 比當初已改變 只牽強地相處」,Michael右手揸住枝咪,左手揸緊拳頭,聲嘶力竭咁唱。

晚上接近10點,Michael同三個朋友喺觀塘工業大廈裡面嘅band房夾緊band。佢唱呢首歌時等別肉緊,因為呢首歌唱緊佢嘅心聲嘛,而其他人亦都如痴如醉咁伴住佢喎。

「原來世界怎麼變 友好的心不損 潮流混亂也不」呢個時候Michael嘅電話響起,一聽呢個鈴聲,大家都知道係Ivy打嚟喇。

2012年11月17日星期六

全世界等緊你呀!



今次呢件事就係發生喺一間港島區五星級酒店嘅宴會廳內,當晚連開35席,大家可以想像到呢對新人係幾咁落本去搞呢個婚宴喇。晚上8時多,入席高峰期,賓客們魚貫入場,大約845分,大家都坐好晒喇。

「各位來賓,晚安。歡迎大家嚟臨Judy同埋Alex嘅晚宴,我先代表一對新人多謝大家。」由要求多多嘅新娘聘請番嚟嘅專業司儀阿占喺台上面講。

2012年11月16日星期五

頑童日記 - 序



頑童日記 -

「頑童日記」呢一個系列嘅命名我係參考匈牙利裔女作家克里斯多夫雅歌塔所創作嘅《惡童三部曲》而作嘅。不過,我同佢嘅成就當然係差天共地喇。呢三部曲我細個讀書嘅時候睇過,至於內容講乜呢,我真係冇咩印象喇,剩係畀我感覺到好黑暗、睇完好唔舒服咁囉。至於點解會考佢嘅大作而命名我嘅拙作呢,原因就係我寫完呢幾個故事之後,回想番都覺得好黑暗、諗完都好唔舒服。

2012年11月15日星期四

行七殺嘅流年



殺破狼呢三曜都係主變化,今日專講七殺,其他兩曜,往後有機會再講。 

七殺嘅變化,往往嚟得快,令人意料不及,同埋起碼都經歷最少一次嘅挫折。如果再會上火鈴,變化嘅速度大大加強。好彩小弟嘅七殺見左右,能夠將辛勞緩解少少。對斗數認識較深嘅,有以上嘅資料,都知道我個命盤大致如何喇。 

求學時期 - 序



求學時期,好多人都會有一大堆理想,最普遍嘅 莫過於我第日大個要做醫生、做律師、為人民服務、做大有錢佬等等等等。有極少部份嘅人就真係會好畀心機咁向呢個目標進發,但係絕大多數人都係口號式咁講吓 就算,最後都係庸碌一生,做個打工仔就算喇。而小弟呢,當然係大多數嗰批喇。

回想番中學時期,我真係一舊飯咁,冇咩目標,冇咩方向。雖然,而家都係一樣。

我哋飛嚟喇(2/2)



小孩們:

我相信除咗一對新人外,呢班細路係唯一真心享受呢個過程嘅一群。個個小朋友由聽到突~~~~~~開始,直到見到直昇機由遠飛至近,再到降落,無不目瞪口呆,即係我哋所講開嘅“O晒咀呀。佢哋嘅眼都唔眨當然係同攝影師嘅眼都唔眨好大分別喇。有個細路仲係咁拉佢媽媽條one-piece,大聲講:「媽咪,我嚟緊考試考前十名,我要下年暑假去學揸直昇機。」媽媽為咗唔好走光,求其應佢:「好喇好喇,咁你畀心機讀書喇。」

2012年11月14日星期三

我哋飛嚟喇(1/2)



印象中當時係初秋下午時份,全場嘅賓客同埋我就企喺一片空地度曬太陽。為咩呢? 咪就係為咗等一對新人大“架”光臨囉。

曬咗半個鐘之後。 突~~~~~~~~~~~~~~~~~~~~

直昇機嘅引擎聲劃破長空,由遠至近,佢哋終於飛到嚟喇!!!可能我見識少喇,呢單嘢對我嚟講真係最浮誇喇。嘩!!! 坐直昇機嚟喎,新郎哥呢招真係冧爆喇。

別人的婚禮 - 序



大家睇完嗰標題唔駛咁擔心,我唔係寫埋D咩「新娘結婚了,新郎不是我」嗰D老套嘢。
曾經有一段時間,因為工作嘅關係,我成日要去別人的婚禮。我諗數數埋埋,都去咗二、三百個婚宴。無論大小酒樓酒店、郊外、離島、沙灘、船上嘅,我都有幸見識過。

絕大部份都係D好公式化嘅,不過,特別嘅都唔少嘅,我會慢慢分享畀大家。如果正在計劃結婚嘅朋友,可以喺呢度偷吓橋嘅。



2012年11月12日星期一

我的第一篇網誌



自從離開咗學校之後,好耐都未寫過嘢喇。

還記得中學時代我都叫做寫過吓日記咁嘅,內容都係寫吓d校園生活咁喇。不過呢個習慣,維咗持大約兩年就放棄咗。一來我個人比較懶,又冇咩恒心;二來我嘅校園生活都好無聊吓,冇咩嘢值得寫。

至於點解我又會無喇喇寫blog?最近生活過得好枯燥、好平淡,好想搵d嘢搞吓,咁不如寫吓嘢喇。

雖然我唔知今次係咪又係三分鐘熱度,不過,唔諗咁多喇,寫咗先算喇。