2012年11月15日星期四

我哋飛嚟喇(2/2)



小孩們:

我相信除咗一對新人外,呢班細路係唯一真心享受呢個過程嘅一群。個個小朋友由聽到突~~~~~~開始,直到見到直昇機由遠飛至近,再到降落,無不目瞪口呆,即係我哋所講開嘅“O晒咀呀。佢哋嘅眼都唔眨當然係同攝影師嘅眼都唔眨好大分別喇。有個細路仲係咁拉佢媽媽條one-piece,大聲講:「媽咪,我嚟緊考試考前十名,我要下年暑假去學揸直昇機。」媽媽為咗唔好走光,求其應佢:「好喇好喇,咁你畀心機讀書喇。」


講完四周圍D人,而家繼續講落去喇。

直昇機停定後,新郎哥第一時間步出機倉,小心奕奕咁扶住新娘子落嚟。呢一系列嘅動作同公仔箱中視帝黎耀祥所演嘅角色差唔多喇。(:唔係「巾幗X雄」喎,而係「大太X」呀) 我再望向新娘子個樣,冧到呢,當正自己係徐子淇咁款呀,當然,個樣同身材就差好遠喇。最後,再加上一個著住件A2、貌似黃敏德嘅機師由直昇機駕駛座慢慢行落嚟,行到一對新人面約1米前,竪起拇指做個GOOD JOB手勢,跟住好瀟灑中轉身步入人群當中。成件事真係型到呢~~~

姊妹們本能地即時對住呢個畫面高呼尖叫喇。一對新人為咗回應姊妹們嘅尖叫祝福,兩位亦都好合拍咁向佢哋揮手、點頭微笑,以表謝意。但作為旁觀者嘅我,一直都有觀察到班姊妹嘅目光同埋焦點,梗係明白佢哋嘅高呼尖叫深層意義喇。

隨著直昇機嘅降落,一對新人嘅到場,呢場SHOW先至係正式開始呀。





1 則留言: