2012年11月17日星期六

全世界等緊你呀!



今次呢件事就係發生喺一間港島區五星級酒店嘅宴會廳內,當晚連開35席,大家可以想像到呢對新人係幾咁落本去搞呢個婚宴喇。晚上8時多,入席高峰期,賓客們魚貫入場,大約845分,大家都坐好晒喇。

「各位來賓,晚安。歡迎大家嚟臨Judy同埋Alex嘅晚宴,我先代表一對新人多謝大家。」由要求多多嘅新娘聘請番嚟嘅專業司儀阿占喺台上面講。

好喇,我形容一吓阿占先。佢大約一點六五米高,帶黑色粗框眼鏡,當晚gel咗個all back頭,著黑色西裝外套、領口位銀白色邊,黑色貼身西褲,腳踏一對超尖頭啡色皮鞋。至於個樣方面,呢D嘢,真係見仁見志喇。

但係,有樣嘢呢我係100%肯定嘅,就係佢超口臭!大家千祈唔好誤會喎,唔係把口好衰寸寸貢嗰D口臭喎,係有臭味嗰隻喎。點解我又知,因為我6點幾嗰時要近距離同佢夾嘢囉。我當時即刻伸出友誼之手,當然唔係捂住個鼻,因為咁樣做係好唔友誼嘅,而係問佢要唔要食香口膠。點知佢好有自信咁答我:「唔駛喇,一陣一路上台講嘢,一路食chewing gum,唔pro呀。」不過,持平D講,佢同我夾嘢時佢係好有禮貌嘅,一D都唔囂張。

講咗咁耐廢話,入番正題先。阿占講左大輪介紹新人嘅門面話之後,到播Judy & Alex嘅成長片段喇。播完後就梗係輪到新人進場喇。

「各位來賓,麻煩大家企起身,以熱烈嘅掌聲歡迎一對新人進場。咩話,大聲D,係喇,再大聲D,你哋嘅掌聲越大,就越代表你哋對Judy同埋Alex嘅祝福越多。」,阿占好自信咁講。我喺台下望住佢,越講越high,好似當咗自己係主角咁樣。一對新人進咗場之後,阿占就請咗佢哋上台,安排佢哋企係台中間。

叉開一陣先,唔知大家有冇發覺呢,近年來D婚宴好興玩獻花畀父母、以表孝心喎。點解會無端端有D咁嘅idea,知唔係我哋諗出嚟賺錢嘅策略囉。

好,繼續。

阿占跟住話:「而家我哋請埋Judy & Alex嘅爸爸媽媽上台先。」一講完之後,佢好熟練咁攞開個咪,擰向酒店經理,細細聲叫個經理攞兩紥花出嚟。

阿占心諗:「所有道具ready晒,但係台上得8個人嘅,唔對路喎,好似少緊個人喎。數吓先:自己、兩個攞住花嘅經理、JudyJudy媽媽、Judy爸爸、AlexAlex媽媽。吖,少咗Alex爸爸呀,唔通佢去咗toilet???

跟住阿占又發揮佢嘅幽默感,好有經驗咁講:「外父大人,仲掙你喎,係咪好緊張呢,唔駛怕羞喎,我哋全世界等緊你呀。而家麻煩姊妹們陪同新外父喺下面上嚟。」

此話一出,全場鴉雀無聲。因為,新外父真係幾年前去咗下面呀。

新郎盡力忍住道氣,係阿占耳邊講咗幾句嘢。至於呢幾句係咩,真係得阿占同埋Alex先知喇。

阿占聽完之後,由幽默tone變成嚴肅tone咁話:「而家首先由Judy & Alex獻花畀Alex媽媽先。





1 則留言: