2012年11月20日星期二

飛虎(1/2) - 兩個好鍾意玩玩具鎗嘅男孩




頑童日記首部曲 - 飛虎 - 兩個好鍾意玩玩具鎗嘅男孩()

本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

「叮噹、叮噹叮噹、叮噹……

突如其來嘅門鐘聲將原本專注咁砌緊模型嘅高達仔驚醒,佢一路放低手上嘅剪鉗一路嗌:「嚟喇,嚟緊喇。」一路嗌,心裡面又諗:「頂!邊個契弟阻住我砌模型呀。」



門開咗之後,佢見到個子唔高,身穿海藍色迷彩短袖衫嘅羅拔臣對住自己陰陰咀咁笑,佢就對羅拔臣話:「妖,阻Q住晒我砌模型呀,乜事呀?著埋迷彩衫添,有軍事行動呀?」 羅拔臣繼續笑而不語,將佢自己個背囊除低,跟住慢慢打開,故作神秘咁款喎,搞到高達仔嘅心情由憤怒變成疑惑。

「嘩!MP5A5呀,正喎,幾時買咗呀?」高達仔兩眼發晒光咁講。

羅拔臣沾沾自喜咁答:「買咗兩日咋,有冇興趣去試鎗先?」

高達仔:「梗係有喇。不過,去邊度試先?」

羅拔臣輕鬆咁應佢:「去公園打獵囉,仲駛問嘅。」

好!一拍即合,高達仔二話不說,就喺櫃筒裡面攞咗一樽0.2g BB彈,同埋佢枝秘密武器 – M92F出嚟喇。兩人好有默契咁,你幫我loading,我幫你入氣,不消10分鐘就可以take action喇。
 

(註:MP5同埋M92F係當時飛虎隊嘅常規武器裝備。)

兩人既緊張,又興奮,好快就行到去公園喇,去到左望右望,都見到幾隻雀仔嘅。好喇,打獵行動正式開始。D鎗聲咁大,一開鎗就嚇走晒D雀仔喇。再加上兩條友仔眼界其差,邊度會射到雀仔吖。射咗10分鐘都係得個桔,兩個人都無晒癮喇。

高達仔終於開口:「唉,唔玩喇,瞄咗咁耐都射唔中嘅。」

羅拔臣意猶未盡:「Let's go and see if we can find something bigger

高達仔:「都好喇。」

行咗成半個鐘,一隻老鼠都搵唔到呀,最後,行到去一個公共屋村嘅小公園度停咗落嚟喇。

高達仔就死咁話:「我投降喇,行到好熱、好攰喇。」

羅拔臣又陰陰咀咁笑:「Let's go and see if we can find something bigger than bigger

高達仔當然明白佢咩意思喇,佢冇講嘢,只係用一個奸笑嚟回應羅拔臣。

佢哋好有默契咁上咗其中一幢樓,去到5樓就停低咗喇。兩人行咗出去露台,向下四處張望,再互相交換一個眼色。佢哋心裡都明白到,就係呢度喇。

5
分鐘後......

一個年約30歲、skinhead、身材健碩、戴住副黑超嘅男人剛剛經過。高達仔望一望羅拔臣,大家心照不宣。

聲音從露台中響起了。

........ ... ..........砰砰砰砰砰砰砰..............砰砰.............哎呀........................X你吖.........哎呀.........你哋咪X走呀.......X街仔.....................

一輪聲音後,露台再次回復平靜。


待續...


 

沒有留言:

發佈留言