2012年11月14日星期三

我哋飛嚟喇(1/2)



印象中當時係初秋下午時份,全場嘅賓客同埋我就企喺一片空地度曬太陽。為咩呢? 咪就係為咗等一對新人大“架”光臨囉。

曬咗半個鐘之後。 突~~~~~~~~~~~~~~~~~~~~

直昇機嘅引擎聲劃破長空,由遠至近,佢哋終於飛到嚟喇!!!可能我見識少喇,呢單嘢對我嚟講真係最浮誇喇。嘩!!! 坐直昇機嚟喎,新郎哥呢招真係冧爆喇。

我諗大家都知呀,直昇機降落嗰時,由於氣流嘅關係,會捲起一陣風,搞到四周塵土飛揚,沙塵滾滾。我略略描述吓四周嘅人先喇。

兄弟姊妹們:

因為曬咗一輪太陽嘅關係,一班化行晒裝、著住低胸晚裝嘅姊妹,佢哋嘅汗水、厚妝同沙塵產生咗化學反應。而另一邊廂,兄弟們都唔見好得去邊,個個著晒全套西裝,剩得塊面同個頭暴露於空氣之外。汗水、頭髮、GEL又同沙塵產生咗化學反應。個反應嘅結果係個個都好似搽咗一層粉咁款囉。

賓客及長者們:

個個賓客同埋長者都用手遮面擋鼻,希望D沙塵遠離自己,但係邊有咁易吖。最慘係一個坐住輪椅嘅婆婆,唔知係咪吸咗D塵內去個肺度,起勢咁咳。好彩佢係長輩級咋,如果唔係一早畀人話佢破壞晒D氣氛喇。而企喺佢隔離侍奉佢嘅菲律賓傭人,又幫佢拍背,又攞暖水畀婆婆飲,又攞住把傘幫婆婆擋太陽,咁樣Multi-Tasking法,呢個傭工真抵讚呀。

攝影攝錄的工作人員:

我見到都替佢哋幾個慘呀,攞住部大機大汗疊細汗都係為咗捕捉呢對新人嘅最美一刻。D沙同埋塵兜口兜面咁吹埋嚟,佢哋仲要堅守崗位,眼都唔眨咁。你估佢哋真心想咁專業嘅咩,佢哋驚miss咗影唔到D黃金鏡頭而畀個客剷咋。當面剷你事小,唔聲唔聲上網唱你唔pro先事大呀,分分鐘冇咗好多生意都唔知自己衰乜。我真係心表同情呀。


待續... 



2 則留言: