I‧I(2/2) - 四個男孩在郊野公園的一夜

頑童日記二部曲 -I‧I - 四個男孩在郊野公園的一夜(下)

本故事純屬虛構，如有雷同，實屬巧合。故事情節或會觸犯刑事罪行，各位切勿模仿。

一個男人泊咗架車喺油站入油之後，落車行咗去對面行人路。佢一路食煙，一路打電話，電話響咗兩吓就接通，電話嘅另一端傳來……

「你好，呢度係999報案中心，有乜可以幫到你？」一位警察通訊員說。

男人：「我而家架車停咗喺X油站，大約5分鐘前，我揸車經過XX郊野公園燒烤場嗰段，條馬路鋪咗好多石頭，望出去仲見到路邊草叢隱約有幾個人踎喺度，我擔心可能係ii(即係illegalimmigrant)想喺度打劫，麻煩你哋派人去check吓。」

「都玩到差唔多喇，不如彈埋呢次走喇。」袋鼠同其他人講。

之後大佬話：「咁呀，都好喇，都攰攰哋喇，玩多嘢就番去瞓喇。咁不如我哋嚟個終極一彈喇，我同袋鼠就去水道口嗰邊彈，你哋兩個就留喺呢邊彈喇。」

講完之後，佢哋4個就急急腳咁埋位standby喇。等咗一陣，佢哋聽到車聲喇，大家都懷住緊張嘅心情，迎接呢一晚嘅終極一彈。車聲越嚟越近，佢哋終於見到車頭燈射出嚟嘅光喇。

「X街！走呀，係警車呀！！！」諾基亞嗌破喉嚨咁通知大家。其他人一聽到，梗係即時閃人喇，唔通企定定搏拉咩…

由於諾基亞同高爾夫喺東，大佬同袋鼠喺西，所以佢哋被迫分開走喇。而班警察見到咁嘅情況，就梗係即刻落車追喇，班警察亦都兵分兩路咁去追佢哋，而家我哋先睇吓東邊嘅情況先。

諾基亞同高爾夫一路走呀走，後面嗰兩個警察就一路追，當跑到過咗一個轉彎位時，其中一個警察就大嗌：「唔好走呀，企係度，再走就開鎗！」佢兩個一聽到呢句嘢，本能咁停咗一秒，之後向後望。

高爾夫好輕佻咁講：「超！人都見唔到點開鎗呀，吹水！我哋繼續走。」

再走多一陣，佢哋兩個就番到去佢哋嘅露營營地喇。番到去之後，佢哋第一時間，點番著個火，開埋gas燈，每人揸住罐汽水，仲有開咗包薯片。

「細路，坐咗係度好耐呀？有冇見有咩人經過呀？你哋總共有幾多人嚟露營呀？」其中一個警察問。

諾基亞扮晒嘢咁答：「坐咗好耐喇，冇見咩人喎，我哋總共有4個人嚟，其中2個去咗攞水。」高爾夫見諾基亞扮到似層層咁，佢又一面無知咁講：「發生咗咩事呀阿Sir？你哋好似好緊張咁嘅？」

另一個seniorD嘅警察就答：「我哋發現呢度有非法入境者，而家搵緊佢哋，你哋自己小心D呀。」講完之後，佢哋又繼續行去第二度再搵喇。

高爾夫同諾基亞互相對望，微笑不語。

高爾夫同諾基亞好成功咁逃過警察嘅追捕，咁西邊嘅大佬同袋鼠情況又如何呢。

佢哋兩個都好合拍咁一齊走，但係荒不擇路，走走吓走咗入去一個工地度喎。呢個工地得一個出口，走咗入去之後，佢哋都心知不妙喇。大佬先開口：「今次斷正喇，我哋冇路可逃喇。」袋鼠就話：「你睇，嗰度有一個石堆，我哋不如匿喺嗰度喇，佢哋應該搵唔到我哋嘅。好過我哋而家走番出去，咁就一定死梗。」兩個決定咗之前，就即刻動身走埋去踎底喇。

過咗一陣，電筒嘅光來來回回咁向石堆掃射。跟住有人開聲：「師兄你睇，石堆後面好似有人喎，不如埋去睇吓。」另一人答：「小心為上呀，喺呢度照咗無人行出嚟就即係冇喇，去第二邊再搵搵喇。」之後，再冇電筒嘅光，亦都再冇人聲喇。大佬同袋鼠你眼望我眼，郁都唔郁咁繼續踎咗喺度。

「喂，諗諗吓唔對路喎，我哋冇事啫，萬一大佬同袋鼠畀人捉到，我哋都唔可以置身事外喎，不如我哋又去搵佢哋，希望快過其他人搵到喇，咁咪可以夾定口供囉。」高爾夫開口同諾基亞講。於是，佢哋兩個攞齊電筒就出發喇，一路行，一路照，一路嗌「大佬、袋鼠」咁，行咗差唔多一個鐘，咁啱就摸到去嗰個工地度喎。

踎咗兩個幾鐘嘅大佬同袋鼠，聽到高爾夫嘅叫聲，終於鬆咗一口氣，佢哋好似D災難幸存者見到有救援人員咁開心，於是兩個又腳痹又腳震咁震吓震吓出番嚟。諾基亞見到佢哋冇事，即係喺個背嚢度攞咗枝水同埋麵包畀佢哋食。

最後，佢哋一行4人拖完疲憊嘅身驅，行番去營地度，呢個時候已經差唔多天光喇。


完

紅日 - 李克勤

作曲：立川俊之

作詞：李克勤

編曲：方樹樑

命運就算顛沛流離   命運就算曲折離奇

命運就算恐嚇著你做人沒趣味

別流淚   心酸  更不應捨棄

我願能   一生永遠陪伴你

一生之中兜兜轉轉    那會看清楚

徬徨時我也試過獨坐一角像是沒協助

在某年   那幼小的我

跌倒過幾多幾多落淚在雨夜滂沱

一生之中彎彎曲曲我也要走過

從何時有你有你伴我給我熱烈地拍和

像紅日之火   燃點真的我

結伴行   千山也定能踏過

讓晚風   輕輕吹過

伴送著清幽花香像是在祝福你我

讓晚星   輕輕閃過

閃出你每個希冀如浪花   快要沾濕我