柒公民系列(一) - 逆子弒母(3/3)

Bobby見有人同佢唱反調，職業病即時發作，力sell 吳繫仁就係殺人兇手。佢一輪咀咁話：「證據多蘿蘿喇，求其講幾個都夠喇。首先，12月7號嗰晚，有鄰居聽到何婆婆屋企有爭吵聲，仲要係男人聲添。仲有喎，大廈嘅閉路電視拍到吳繫仁一路講電話，一路好匆忙咁離開大廈。最後，吳繫仁畀人拉嗰日，係佢身上搜到兩條可以用嚟打開何婆婆屋企大門同埋鐵閘嘅鎖匙。」

其餘6個人好留心咁聽佢講，張師奶仲係咁點頭和應添。Bobby見有人支持，飲咗啖水之後繼續發表佢嘅偉論：「我認為成件事係咁嘅，呢個不孝子因為要錢買白粉，咁咪靜雞雞潛入阿媽屋企偷嘢囉，點知畀阿媽發現，阿媽同佢吵大鑊，佢一怒之下，咪摙死咗阿媽，之後攞晒D值錢嘢走囉。成件案就係咁簡單喇，唔好簡單複雜化喇。」

Mary唔係好耐煩咁話：「Don't make it too complicated la, Uncle Chan. 我哋嚟判案，唔係嚟查案呀。」

陳叔平和咁講：「後生女，呢條除咗係人命之外，仲係一個為死者討回嘅公道嚟，我希望你認真D聽吓我講。」

Mary雖然唔係咁服氣，但都點頭回聲一吓。

陳叔於是繼續：「Bobby講嘅係事實，但係呢幾點只係證明咗7號晚有男人去過何婆婆住嗰幢大廈，同埋佢有何婆婆屋企鎖匙咋喎。鄰居聽到嘅男人聲，唔可以肯定係吳繫仁喎。」

Peter開口講：「陳叔，我就同你講證據喇。7號當日，時間20:01，大廈閉路電視拍到吳繫仁離開。時間20:08，附近便利店嘅閉路電視拍到吳繫仁買煙，你記唔記得呀？」

陳叔答：「我記得，d證據係第5日呈堂嘛，我有寫低，你睇……」

Peter呢個時候接住講：「便利店嘅閉路電視拍到吳繫仁嘅大頭，佢當時塊面嘅右邊有擦損嘅痕跡。而法醫為何婆婆驗屍嘅時候，亦都發現佢嘅左手有吳繫仁嘅皮膚組織。咁樣好明顯，係吳繫仁摙住何婆婆條頸時，何婆婆隻手亂抓，抓傷咗吳繫仁塊面喇。」

OL接住：「係呀，咁樣嘅推斷都好合理吖。」

陳叔好有條理咁講：「我又有另一個睇法喎。我估吳繫仁應該係當晚番屋企同阿媽食飯，食飯嗰陣何婆婆見佢塊面損咗，就伸手去摸吓，關心吓問吓個仔傷口嘅事，痛唔痛喇。食完飯之後，何婆婆瞓咗喺梳化小睡。吳繫仁就去執嘢洗碗。點解我咁講，大家可以睇番證物P24嗰本相簿嘅第37同38張相。第37張相係影咗廚房洗手盤邊有兩隻碗同兩對筷子放咗喺度吹乾，何婆婆一個人獨居，平時又點會用兩對筷子兩隻碗呢。而第38張相就係一對大碼嘅膠手套疊咗喺盤邊，好明顯大碼膠手套唔會係何婆婆用喇。跟住，吳繫仁電話響起，有事要走。但係佢冇嘈醒媽媽，佢自己走先，不過佢掛住講電話，就唔記鎖門，根據電話公司嘅記錄，吳繫仁個電話當日喺19:55接聽咗一個來電，講咗8分鐘先收線，吻合番大廈閉路電視拍到吳繫仁離開時係講緊電話。由於佢走嘅時候冇鎖門，咁其他人後來就可以好容易咁入到何婆婆間屋度喇。」

張師奶半信半疑咁話：「陳叔講嘅嘢都係有可能發生嘅，我真係唔能夠肯定吳繫仁有殺佢阿媽呀，所以我改為投佢冇罪，寧縱莫枉吖嘛，如果我投錯，佢真係咁大逆不道，遲D個天都會修佢喇。」

Mary又答口話：「Uncle Chan分析都啱嘅，我buy 你。張師奶，你e呢句「大逆不道遲D個天都會修佢」堅正呀， I change my mind now。」

陳叔客氣地回應：「多謝你哋兩個好有耐性咁聽我講，同埋同意我嘅說法。Bobby，我哋而家嘅比數係4比3喇喎，唔係一個有效裁決，睇嚟我哋要繼續傾落去喇。」

未等Bobby開口回應，OL已經忍唔住出聲：「陳叔你好似講到吳繫仁好孝順咁喎，佢如果係咁孝順嘅話，就唔會一錯再錯喇。你唔好忘記，佢有幾大疊案底呀，我就唔信一個道友有咁孝順喇。」

Mary聽到之後，爭住發言：「Aunt OL，孝唔孝順，好似同殺唔殺人冇咩關係喎。」

一畀人叫Aunt，OL點忍呀：「細路女，我食鹽多過你食米喇，佢係白粉友嚟呀，癮起咩都做得出喇，你見過世面未呀，吓？」

Bobby見兩女想吵落去，做事佬咁話：「兩位靚女，唔駛咁燥嘅，Mary講得好啱呀，OL你又講得冇錯喎。雖然我認為佢有做，但係道友呢一個point我就有少少保留喇。因為根據番證物D5嗰分石湖墟美沙酮診所嘅記錄，吳繫仁由10年開始，係有定期去攞美沙酮嚟飲喎，咁或多或少都顯示到佢係有心去介吖。」

王Sir突然打破沉默：「各位，我有新發現呀。大家有冇留意到「吳祥命」個骨灰盅呀。」全部人靜晒望住佢，張師奶最先開口話：「有呀，唉，人死咗連骨灰都畀人倒晒出嚟，真係冇陰公呀。」

王Sir繼續：「大家試吓將幾樣證據加埋一齊睇吖。首先，「吳祥命」個骨灰盅嘅碎片同埋骨灰散到一地都係。呢個骨灰盅一定係何婆婆死後先打爛，呢樣一大家都同意，係咪？」

OL好肯定咁答：「係吖，何婆婆咁愛惜佢老公，如果係一早就打爛，何婆婆又點會唔理呢。」其他5個人亦點頭同意。

王Sir再講：「好，咁我哋可以推斷呢個骨灰盅係真兇打爛嘅，而當個骨灰盅跌落地下嘅時候，D骨灰會散到周圍都喺。大家再睇番一次大廈閉路電視拍到吳繫仁離開嘅片段，佢當日著黑色長褲、黑鞋，大家有冇留意到呀？」

Bobby呢個時候大叫：「哎呀，我明喇。你嘅意思係話，如果真係吳繫仁打爛個骨灰盅嘅話，佢條褲同埋對鞋點都會沾咗好多白色嘅骨灰。但係，我哋喺閉路電視嘅片段度，一D都睇唔到喎。」

Peter講：「咁就可以間接證明吳繫仁喺7號離開何婆婆屋企時，個骨灰盅係未爛喇。咁進一步講，即係話吳繫仁走時，何婆婆未死喇。」

張師奶好順口咁話：「咁即係話，吳繫仁7號晚走時，何婆婆生勾勾喇。咁樣邊個係兇手呀?」

Mary：「maybe係之後有人入屋偷嘢，唔小心整跌咗個骨灰盅，驚醒咗何婆婆。Then何婆婆大叫，個賊驚畀人發現，咁咪摙死咗何婆婆囉。」

陳叔話：「究竟邊個係真兇，剩係得何婆婆同埋個真兇先知喇。我哋而家算搵到一個合理疑點喇，咁即係話，我哋唔可以100%肯定吳繫仁係有殺到佢阿媽喇。各位，有冇人有意見？」

30分鐘之後.........

「COURT~~~~~」

「各位陪審員，你哋有裁決喇，係嘛？」法官問。

.

.

.

.

.

Bobby答：「係。我哋嘅比數係7比0，裁決係………」


完